១រយៈចុងក្រោយនេះ មានការចែករំលែកនូវពត៍មានមិនពិតមួយចំនួនអំពី ព្រឹទ្ធាចារ្យទេវនាដនិម្មិត ឯម ធាយ ក្នុងអត្ថន័យបង្កាច់បង្ខូចថា លោកបានលួចលាក់ទៅបង្រៀន នៅប្រទេសសៀម ហើយការស្លា.ប់របស់លោកយាយ គឺជាបាបកម្ម ដែលលោកយាយត្រូវតែទទួល ។
ក្រោយពីមានរឿងបែបនេះកើតឡើងហើយនោះ ក្រុមគ្រួសាររបស់លោកយាយ បានចេញមុខមកបដិសេធ និងបានចាត់ទុកសារដែលបានចែកចាយខាងលើនេះ គឺជារឿងមិនពិត និងជាការបំភ្លៃការពិតទាំងស្រុង។ ដោយបានប្រកាសថា «សូមគោរពជំរាបជូនដល់សម្តេច ទ្រង់ ឯកឧត្តម លោកជំទាវ លោក លោកស្រី ជាទីគោរពស្រលាញ់ មួយរយៈដែលក្រុមគ្រួសារលោកយាយ ឯម ធាយ បានបាត់បង់លោកយាយជាទីគោរពស្រលាញ់ ហើយមានការសោកសង្រេង និងនឹករលឹកជាពន់ពេក ប៉ុន្តែគួរអោយសោកស្តាយ បន្ទាប់ពីលោកយាយបានចែកឋានទៅ មានបុគ្គលម្នាក់មានងារជាទីប្រឹក្សាក្រសួង បានផ្ញើសារចែករំលែកនូវព័ត៌មានបំភ្លៃថា លោកយាយ បានលួចទៅបង្រៀនប្រទេសសៀម ហើយការចែកឋានរបស់លោកយាយដោយឆ្លងជំងឺកូវីដ គឺជាបាបកម្មរបស់ក្រុមគ្រួសារលោកយាយ និងមានពាក្យញុះញុងបំភ្លៃការពិតជាច្រើនទៀត ហើយសារនោះបានបន្តចែករំលែកទៅមនុស្សជាច្រើន។ សូមបញ្ជាក់ថាលោកយាយមិនដែលមានគំនិតក្បត់វប្បធម៌ជាតិនោះទេ។ ហើយក្រុមគ្រួសារលោកយាយ ឯម ធាយ កំពុងស្វែងរកដំណោះស្រាយរកយុត្តិធម៌ ដើម្បីរក្សាកិត្តិយស និងស្នាដៃដែលលោកយាយខំក៏សាងឡើងស្ទើពេញមួយជីវិត។
គួររំលឹកផងដែរថា បើយោងតាមការចុះផ្សាយពីសារព័ត៌មានតាមអនឡាញមួយ ដោយដកស្រង់សម្តីរបស់ព្រឹទ្ធាចារ្យទេវនាដនិម្មិត ឯម ធាយ បានអោយដឹងថា ក្នុងឆ្នាំ១៩៨៣ ក្រោយកម្ពុជាទទួលបានសុខសន្តិភាពបណ្ដើរៗវិស័យវប្បធម៌សិល្បៈចាប់ផ្ដើមងើបឡើងជាបន្តបន្ទាប់ ទន្ទឹមនឹងការងើបឡើង និងការចុះខ្សោយនៃវប្បធម៌ខ្មែរ ប្រទេសសៀមដែលជាប្រទេសភូមិផងរបងជាមួយគ្នា និងមានប្រវត្តិសាស្ត្រសិល្បៈវប្បធម៌សឹងតែច្របាច់បញ្ចូលគ្នា បានអញ្ជើញលោកយាយ ឯម ធាយ ទាំងគ្រួសារឱ្យទៅរស់នៅឯប្រទេសថៃ ដោយយកឧទ្ធម្ភាគចក្រទៅយកលោកដោយផ្ទាល់ និងសន្យាថាផ្គត់ផ្គង់ប្រាក់ខែ និងផ្ទះសម្បែងយ៉ាងច្រើនលើសលប់ជូនលោកយាយ។
https://fb.watch/9P-zuK_BmZ/
នេះមិនមែនជាលើកដំបូងរបស់លោកយាយនោះទេ ព្រោះកាលពីឆ្នាំ១៩៧១ សៀមក៏បានស្នើលោកយាយទៅបង្ហាត់គេដែរ ប៉ុន្តែលោកយាយមិនយល់ព្រម ហើយក៏បដិសេធ លោកយាយសុខចិត្តរស់នៅដោយផ្សងជីវិតក្នុងសម័យវាលពិឃាដ។លោកយាយក៏បានបន្តប្រាប់ទៀតថា កាលនោះ លោកយាយមិនបានទៅបង្រៀននៅថៃទេ ថៃនៅតែបន្តអង្វរសុំអ្នកគ្រូ ម្តងជា២ដង និងអ្នកគ្រូផ្សេងៗជាច្រើនរូបទៀតដែលនៅសេសសល់ពីសម័យសង្គមរាស្ត្រនិយម ដែលរួចជីវិតពីរបបខ្មែរក្រហមឱ្យទៅបង្ហាត់គេដល់ស្រុក ដោយសន្យាជូនលាភសក្ការៈដូចៗគ្នាគ្រប់គ្នា។ លោកយាយជាអ្នកចេះដឹងជ្រៅជ្រះខ្លាំងណាស់ខាងផ្នែករបាំព្រះរាជទ្រព្យខ្មែរ និងចម្រៀងបែបបទមហោរីជាច្រើនរាប់មិនអស់ ហើយលោកយាយតែងតែចេះច្រៀងចម្រៀងភាសាសៀម ដែលចម្រៀងភាសាសៀមនោះ គឺជាបទតាក់តែងឡើងក្នុងនគរខ្មែរ ស្ថិតក្នុងរជ្ជកាលដែលសៀមគ្រប់គ្រងមកយើង។ សៀមដឹងដូច្នេះហើយ ទើបគេចង់បានលោកយាយទៅបង្ហាត់គេដល់ស្រុកទេស ព្រោះថ្វីត្បិតថា ខ្មែរជាប់សំនៀងបរទេសបន្តិចបន្តួចក្តី ប៉ុន្តែខ្មែរឈរលើគោលការណ៍ខ្មែរ និងក្បួនខ្នាតខ្មែរដែលគេចង់បានណាស់ តែធ្វើមិនបានដូចខ្មែរ ដូច្នេះគេក៏សូមយកអ្នកគ្រូពីខ្មែរទៅបង្រៀនគេដូចពីសម័យដើមដែលគេយកគ្រូពីយើងទៅបង្ហាត់គេ។ នេះបើតាម សំណេរដកស្រង់ពីប្រសាសន៍ពិតរបស់លោកយាយព្រឹទ្ធាចារ្យទេវនាដនិមិ្មត ឯម ធាយ ថ្ងៃទី៣០ ខែកក្កដា ឆ្នាំ២០២០ ដោយ ពេជ ភារុណ។
គួរបញ្ជាក់ថា ទេវនាដនិម្មិត ឯម ធាយ (ឬ ឯម ធ្ធាយ) បានទទួលមរណភាព ក្នុងជន្មាយុ៨៨ឆ្នាំដោយជរាពាធ កាលពីយប់ឈានចូលថ្ងៃទី១៥ ខែមិថុនា ៕
