Update ៖​ ករណីប្លន់អ្នកលក់ឡេដ៏ល្បី អ៊ាន សៀវម៉ី ៖ Willi​am Guang ជាមេដឹកនាំចោប្លន់ ហើយប្រាប់ពីមូលហេតុដែលខ្លួនសម្រេចចិត្តប្លន់ថា…

ករណីប្លន់នេះបានកើតឡើងនៅវេលាម៉ោង១០៖៥០នាទី ព្រឹកថ្ងៃទី១៩ ខែធ្នូឆ្មាំ២០២១ ម្សិលមិញនេះ នៅចំណុចផ្ទះវីឡាលេខV01 ស្ថិតក្នុងភូមិគោគចំបក់ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ដោយយកបានគ្រឿងអលង្កា ខ្សែរកពេជ្រ ចំនួន 3ខ្សែរ  និងទូរស័ព្ទចំនួន 2គ្រឿង គិតជាទឹកប្រាក់ប្រហែលខ្ទង់លានដុល្លារ។

បើតាមការរៀបរាប់របស់សមត្ថកិច្ចបានឲ្យដឹងថា នៅមុនពេលកើតហេតុជនរងគ្រោះ និងក្រុមគ្រួសារមានមនុស្ស១០នាក់ ក្នុងនោះមាន ប្រុស៤ ស្រី៣ និងក្មេង៣នាក់ (ប្រុស១ស្រី២) កំពុងរៀបចំចេញដំណើរទៅផ្ទះរបស់ខ្លួនទៅខេត្តកំពង់ស្ពឺ ហើយពេលកំពុងរៀបចេញពីផ្ទះ ក៏ស្រាប់តែមានជនសង្ស័យមួយក្រុមមានគ្នា៥នាក់ អង្គុយក្នុងឡាន១នាក់ (ឡានម៉ាក GS អត់ស្លាកលេខពណ៌ស) (ក្នុងចំណោម៥នាក់មានម្នាក់ពាក់សក្តិ៤) ចុះមកឃាត់ជនរងគ្រោះមិនឲ្យចេញដំណើរ ហើយប្រាប់ជនរងគ្រោះថា ពួកគេមកពីក្រសួងមកអនុវត្តដីការ។

សមត្ថកិច្ចបានរៀបរាប់ទៀតថា ជនសង្ស័យប្រដាប់ដោយអាវុធវែងមួយដើម(អុឹមសី) និងខ្លី៣ដើម បានបញ្ចូលគ្រាប់ភ្ជុងជនរងគ្រោះដាក់ខ្នោះដៃ និងឆក់ជនរងគ្រោះ ហើយឲ្យជនរងគ្រោះឈ្មោះ អ៊ាន សុីវមុី នាំឡើងទៅជាន់ទី១ បន្ទប់ដាក់គ្រឿងអលង្កា ហើយឲ្យបើកទូដែកយកគ្រឿងអលង្ការ ដែលមានខ្សែរកពេជ្រ ចំនួន ៣ខ្សែរ និងទូរស័ព្ទ 2គ្រឿង ដាក់ចូលសាក់កាដូពណ៌ខ្មៅ ដែលជនសង្ស័យយកមកជាមួយ។

សមត្ថកិច្ចបញ្ជាក់បន្ថែមថា សរុបទ្រព្យសម្បត្តិដែលជនសង្ស័យយកទៅមានតម្លៃប្រហែលខ្ទង់លានដុល្លារ ក្រោយពេលធ្វើសកម្មភាពរួចជនសង្ស័យទាំងអស់ បានស្រែកហៅនាមសម្ងាត់របស់បក្ខពួកខ្លួន ថា A1 .A2 ម៉ូ ម៉ូ និងបានយកក្បាលកាមេរ៉ា នាំគ្នាឡើងលើរថយន្តដែលមានបក្ខពួករង់ចាំខាងក្នុង ហើយបើកគេចខ្លួនបាត់តែម្តង ដោយបន្សល់ទុកនូវ វត្ថុតាងរួមមាន៖ ខ្នោះដៃចំនួន៤ និងដីកាចំនួន១សន្លឹកប៉ុណ្ណោះ៕

គួរបញ្ជាក់ផងដែរថា ក្នុងពេលនេះ សមត្ថកិច្ច បានចាប់ខ្លួនមេក្លោងបានហើយ ដែលគេស្គាល់ថាជា លោក សុខ សុវណ្ណវឌ្ឍនាសាប៊ុង ហៅ William Guang និងជា ប្រធានគណបក្សខ្មែរក្រោក ។ តាមចម្លើយសារភាពរបស់មេក្លោងរូបនោះ បានអោយដឹងថា មូលហេតុដែលខ្លួនសម្រេចចិត្ត នាំក្រុមរបស់ខ្លួន ចូលទៅប្លន់នោះ ព្រោះតែខ្លួនមិនពេញចិត្តទៅនិងភាពអំនួត និងការបង្អួតទ្រព្យសម្បត្តិ របស់ជនរងគ្រោះ ។ ហើយក្នុងការធ្វើសកម្មភាពប្លន់នោះ គឺខ្លួនជាមេក្លោង មិនបានបញ្ចេញសកម្មភាពប្លន់ដោយផ្ទាល់នោះទេ គឺនៅអង្គុយក្នុងឡាន និងបញ្ជាពីចម្ងាយ ។