១រយៈចុងក្រោយនេះ មហាជនមានការភ្ញាក់ផ្អើលយ៉ាងខ្លាំង ក្រោយពី តារាកំប្លែងនាយ តាក់សុី ដែលកន្លងមកធ្លាប់ត្អូញត្អែរ ពីភាពខ្វះខាតរបស់គ្រួសារលោក និងផ្ញើខ្លួនតែទៅនិងផ្ទះជួលនោះ បានធ្វើពិធីសម្ពោធហាង យ៉ាងធំដុំ រួមជាមួយផ្ទះ ដែលមានតំលៃសរុបជិត ២០មុឺនដុិល្លារ ឯណោះ ។ មិនបង្អង់យូ តារារូបនេះបានចេញមកបកស្រាយពាក់ព័ន្ធទៅនិង ផ្ទះ និងហាងលក់ពូកនោះថា គេហដ្ឋានដែលលោកបានធ្វើកម្មវិធីឡើងកាលពីថ្ងៃទី១៩ ខែធ្នូ ឆ្នាំ២០២១ កន្លងទៅនោះ គឺមិនមែនជាផ្ទះរបស់លោកផ្ទាល់ឡើយ ពោលគឺជាផ្ទះមិត្តភក្តិជិតស្និតរបស់លោក ។
ហើយផ្ទះនឹងជាកម្មសិទ្ធិរបស់មិត្តភក្តិលោកនៅខេត្តព្រៃវែង ដោយគេបានប្រគល់ផ្ទះនឹងឲ្យលោក និងភរិយាស្នាក់នៅជាបណ្តោះអាសន្ន ដោយមិនបានគិតជាប្រាក់ឈ្នួលប្រចាំខែនៃការស្នាក់នៅផ្ទះនោះទេ ក្នុងពេលដែលលុយបើកហាងរកស៊ីនោះក៏ជាលុយមិត្តភក្តិរបស់លោកដែរ។ លោកថា សម្ពោធហាងលក់ពូកនោះ ក៏ជាដើមទុនរបស់មិត្តភក្តិលោកដែរ ដោយសារគាត់ចង់ឲ្យលោកមានមុខរបររកស៊ីផ្ទាល់ខ្លួន និងមានកន្លែងស្នាក់នៅដោយមិនបាច់បង់ថវិកា ហើយមុខរបររកស៊ីលក់ពូកនេះ គឺលោកបើកប្រ៊េនខ្លួនឯង ដោយនាំពូកមកពីប្រទេសថៃ ហើយដាក់ឈ្មោះថា «សុខលីន ហេងហេង» ដែលជាឈ្មោះភរិយារបស់លោក។
នាយ តាក់ស៊ី បានលើកឡើងបញ្ជាក់ថា សម្រាប់ការស្នាក់នៅផ្ទះខាងលើនេះ គឺមិត្តភក្តិរបស់លោកមិនបានកំណត់ពេលវេលាឡើយ ហើយប្រសិនបើទៅថ្ងៃមុខ លោកមានលទ្ធភាពចង់ទិញផ្តាច់ផ្ទះនេះយក ឬក៏ចង់ទិញផ្ទះផ្សេងនៅនោះ ក៏មិត្តភក្តិរបស់លោកមិនជំទាស់ដែរ។
ទោះជាយ៉ាងណា នាយ តាក់ស៊ី បានស្នើសុំអោយបងប្អូនមួយចំនួន ឈប់មានការយល់ច្រឡំថា លោកមានប្រាក់រាប់ម៉ឺនដុល្លារសម្រាប់ទិញផ្ទះ និងបើកហាងរកស៊ី ព្រោះលុយទាំងអស់នេះមិនមែនជាលុយលោកផ្ទាល់ឡើយ ពោលគឺជាលុយរបស់មិត្តភក្តិរបស់លោកតែប៉ុណ្ណោះ។
